Hruni

Dómur/Kynb.mat

Afkvæmi

Smella á mynd til að stækka

Fleiri afkvæmi Hruna komin í tamningu.

Það er ætíð forvitnilegt að fylgjast með þegar fyrstu afkvæmi hvers stóðhests koma til tamningar. Við höfum áður sagt frá tveimur fyrstu afkvæmum Hruna frá Breiðumörk 2 sem voru frumtamin í fyrravor. Þau eru rakin gæðingsefni. Nú hafa bæst við fimm tryppi sem eru í tamningu hjá þeim Hallgrími Birkissyni og Sævari Sigurvinssyni í Arabæ í Flóa.
Hallgrímur segir um tryppin að þetta séu allt reiðhestefni, sum jafnvel gæðingsefni, gangrúm, viljug og með miklar fótahreyfingar. Þau eru öll með gott brokk og töltið er laust þegar eftir því er leitað. Sum tryppanna sýnast vera vel vökur. Hann segist ekki hafa áður fengið eins góðan og samstæðan hóp afkvæma í tamningu.
Hallgrímur segir það augljóst mál að Hruni sé kynbótahestur. Við vekjum athygli á því að með þessum frásögnum og myndum er verið að segja frá ÖLLUM afkvæmum Hruna sem komið hafa til tamningar og sem við vitum um. Það er engu sleppt.
Tvö afkvæmanna, þau Krafla (bleikskjótt) og Hrafnhetta (brúnhöttótt) frá Grund 2 eru fæddar árið 2005.
Þrjú þeirra eru fædd árið 2004, þ.e. Glaumur (rauðskjóttur), Hryna (móálótt) og Bláklukka (brún), öll frá Bakkagerði.
Þetta eru því allt bráðung tryppi og lítið hægt að leggja að þeim. Til fróðleiks má nefna að meðalkynbótamat mæðranna er undir 100 stigum.

Afkvæmi Hruna

Júní 2008: Ég skaust austur á Egilsstaði í byrjun maí. Langaði að sjá tvö tryppi undan Hruna sem er nýbyrjað að temja. Þetta eru tvö fjögurra vetra tryppi, þ.e. Þoka frá Breiðumörk 2 og Gæfa frá Grund 2. Þeir Stefán Sveinsson á Útnyrðingssstöðum og Einar Eysteinsson á Tjarnarlandi, sem eru að temja tryppin, létu mjög vel af þeim. Þau eru áhugasöm, næm og viljug. Gangurinn er fljúgandi rúmur og töltið opið, takthreint og lyftingarmikið. Grunngangtegundir eru góðar og afturfótasporið langt.

Annars er best að láta myndirnar tala sínu máli. Sú móálótta er Þoka frá Breiðumörk og sú rauðskjótta er Gæfa frá Grund. Þó ekki sé hægt að draga of ákveðnar ályktanir af þessum fyrstu tveimur tamningatryppum undan Hruna er það þó tæpast tilviljun að þau skuli vera eins og steypt í mótið hans föður síns. Það eru mikil verðmæti fólgin í því fyrir alla sem koma að hrossarækt að tryppin komi fljótt til, að gangurinn sé opinn, skapið jákvætt og fótahreyfingar góðar. Eftir að hafa margsinnis átt vel ættuð tryppi í tamningu, þar sem hefur þurft að “smíða” í þau ganginn og burðinn, þá er það með ólíkindum að sjá þessi tvö fjögurra vetra tryppi vera orðin þetta flott eftir tveggja mánaða tamningu.
Þegar hægt er að ná þessum eiginleikum fram með því að halda hryssum sínum undir Hruna – ja, er þá ekki töluvert vit í því?!!! Hvers vegna að borga fyrir tamningu í 6 – 10 mánuði þegar 3 mánuðir duga?
Að maður tali nú ekki um ósköpin þegar hrossin eru hvorki farin að tölta hreint né komin í burð eftir tveggja til þriggja ára tamningu.
Og vera þá áður búnir að bíða í 4 – 5 ár eftir að folöldin komist á tamningaaldur!
Við sem stöndum að Hruna erum kannski ekki hlutlaus – en þetta er þó nokkuð sem hver hestamaður þekkir og hefur skoðun á.

Ragnar Tómasson