Minningarhátíð í Skálholti um Jón Arason biskup – mánudaginn 7. nóv. – allir velkomnir!

Þess verður minnst í Skálholti mánudaginn 7. nóvember n.k. að þann dag árið 1550 var Jón Arason biskup á Hólum líflátinn ásamt sonum sínum tveimur.

 Að þessu sinni verður dagskráin með eftirfarandi sniði:  Kl. 17 verður dagskrá til minningar um Jón Arason í Skálholtsdómkirkju. Skálholtskórinn syngur undir stjórn Jóns Bjarnasonar og Bjarni Harðarson fjallar um aftöku Jóns biskups Arasonar og sona hans Björns og  Ara út frá aðstæðum á staðnum. Vígslubiskup Kristján Valur Ingólfsson minnist þeirra feðga í bænargjörð. Samkomunni lýkur með blysför að minnisvarðanum um Hólafeðga.

 kl. 20.00 verður söngdagskrá kirkjukóra úr Suðurprófastdæmi í Skálholtsdómkirkju.

Þetta er árleg kóradagskrá á minningardegi um Jón biskup Arason og í ár koma fjórir kirkjukórar sem syngja sameiginlega og eigin dagskrá, auk þess að syngja með kirkjugestum.  Vígslubiskup, prófastur og prestar munu lesa ritningarlestra og bænir.
Kórarnir sem syngja eru Kór Selfosskirkju, stjórnandi Edit Molnar, Kór Hruna- og Hrepphólakirkju, stjórnandi Stefán Þorleifsson, Kór Odda- og Þykkvabæjarkirkju, stjórnandi Kristín Sigfúsdóttir og Skálholtskórinn, stjórnandi Jón Bjarnason. Umsjón með dagskránni hefur Margrét Bóasdóttir, söngmálastjóri þjóðkirkjunnar.  Allir eru hjartanlega velkomnir og er aðgangur ókeypis. Á eftir verður hægt að kaupa veitingar í Skálholtsskóla.

6. nóvember – allraheilagra messa: Nágrannar í heimsókn á Stóra-Núpi

Sunnudaginn 6. nóvember sem er allra heilagra messa verður messa kl. 14 í Stóra-Núpskirkju.  Eins og venja er til á allra heilagra messu þá verður látinna ástvina minnst.  Kirkjukór Hruna- og Hrepphólasókna kemur í kirkjuheimsókn og mun leiða messusönginn undir stjórn Stefáns Þorleifssonar organista.  Allir hjartanlega velkomnir!

Fermingarbörn safna fyrir Hjálparstarf kirkjunnar – baukar á ferð á Flúðum

Mánudaginn 31. október verða fermingarbörn í Hrunaprestakalli á ferð á Flúðum með söfnunarbauka frá Hjálparstarfi kirkjunnar.  Þannig taka þau þátt í landssöfnun meðal allra fermingarbarna á landinu.  Verkefnið sem fermingarbörnin safna fyrir snýr að því að bæta aðgengi að hreinu vatni hjá bræðrum og okkar og systrum í Eþíópíu og Úganda.  Fermingarbörnin munu ganga í hús og fyrirtæki á Flúðum og verða auk þess í búðinni með söfnunarbauk.  Söfnunin fer fram á milli klukkan 16 og 18 á mánudaginn.  Takið vel á móti þeim!  Og þið sem eruð á facebook, endilega deilið þessari frétt.

Fjölskylduguðsþjónusta og guðsþjónusta með sálmum sr. Sigurbjarnar sunnudaginn 23. október

Sunnudaginn 23. október nk. verður fjölskylduguðsþjónusta í Stóra-Núpskirkju kl. 11.  Tónlist, söngur, biblíusaga og leynigestur.  Samvera fyrir alla fjölskylduna.  Eftir hádegið verður síðan guðsþjónusta í Hrepphólakirkju kl. 14.  Siðbreytingarinnar minnst og sálmar sr. Sigurbjarnar Einarssonar sungnir.  Molasopi á eftir í safnaðarheimili.  Allir velkominir. Sjáumst í kirkju um helgina!

9. október: Guðsþjónusta í Stóra-Núpskirkju og kvöldmessa með léttri tónlist í Hrepphólakirkju

Guðsþjónusta verður í Stóra-Núpskirkju sunnudaginn 9. október kl. 11.  Kirkjukórinn leiðir söng undir stjórn Þorbjargar Jóhannsdóttur organista.  Um kvöldið kl. 20:30 verður síðan kvöldmessa með léttri tónlist í Hrepphólakirkju.  Kirkjukórinn flytur þá hugljúfa sálma í bland við dægurlög.  Undirleikur og stjórn:  Stefán Þorleifsson organisti.  Sjáumst í kirkjunni!

2. október: Fjölskylduguðsþjónusta í Hruna og Tvennir tímar í messu á Ólafsvöllum

Sunnudaginn 2. október nk. verða tvær messur í prestakallinu.  Sú fyrri er fjölskylduguðsþjónusta í Hrunakirkju kl. 11.  Þar verður mikið sungið, sögð biblíusaga og von er á ungum söngröddum sem syngja munu einsöng.  Félagar úr kirkjukór munu einnig syngja.  Umsjón með fjölskylduguðsþjónustunni hafa sr. Óskar og Stefán organisti.  Samvera fyrir alla fjölskylduna.  Síðari messan er svo í Ólafsvallakirkju kl. 14.  Þar mun sönhópur eldri borgara í uppsveitunum, Tvennir tímar, leiða sönginn undir stjórn Stefáns Þorleifssonar organista.  Allir hjartanlega velkomnir!

Fermingarathafnir vorið 2017

Í samráði við foreldra fermingarbarna er ákveðið að fermingarathafnir í prestakallinu verði tvær og báðar á hvítasunnudag, 4. júní.  Sú fyrri verður í Hrepphólakirkju kl. 11 og hin síðari kl. 13:30 í Hrunakirkju.  Fermingarbörnin í vetur verða tólf talsins.

Dagskrá helgihaldsins haustmisserið 2016 og um áramót

Nú liggur fyrir dagskrá helgihaldsins á þessu haustmisseri og til áramóta.  Dagskráin verður send út á næstu dögum í öll hús í prestakallinu og er þess vænst að hún fái sinn stað á ísskápnum eða á minnistöflu heimilisins.  Einnig má sjá dagskrána hér hægra megin á heimasíðunni.  Fyrst á dagskránni er fjölskylduguðsþjónusta í Hrunakirkju sunnudaginn 2. október kl. 11 og svo messa kl. 14 sama dag í Ólafsvallakirkju en þar mun sönghópurinn Tvennir tímar leiða sönginn.  Framundan er fjölbreytt helgihald í kirkjum prestakallsins.  Sjáumst þar!

Uppskerumessa og fjölskylduhátíð laugardaginn 3. september

Laugardaginn 3. september verður uppskerumessa í Hrunakirkju kl. 11.  Fermingarbörn og foreldrar þeirra hvött til að mæta.  Eftir messu verður farið í reiptog og pokahlaup og fleiri leiki.  Auk þess verður boðið upp á grillaðar pylsur, djús og kaffi.  Notaleg samvera fyrir alla fjölskylduna.  Allir velkomnir!  Sóknarprestur

Fundur með foreldrum fermingarbarna

Miðvikudagskvöldið 24. ágúst nk. kl. 20 verður fundur í safnaðarheimili Hrunakirkju með foreldrum fermingarbarna næsta veturs.  Rætt verður m.a. um skipulag starfsins og fermingardaga næsta vors.