Sóknarnefnd

Aðalsafnaðarfundir framundan

Framundan eru aðalsafnaðarfundir sókna í prestakallinu.  Þar verða reikningar viðkomandi sóknar og kirkjugarðs kynntir og bornir undir atkvæði.  Sömuleiðis er rætt um starfsemi síðasta árs og horft til starfs og framkvæmda á næsta ári.  Dagskrá aðalsafnaðarfundar (kosningar, reikningar, skýrslur, önnur mál) er að öðru leyti í samræmi við starfsreglur kirkjunnar um sóknarnefndir.

Aðalsafnaðarfundur Ólafsvallasóknar verður í bókasafninu í Brautarholti þriðjudaginn 24. apríl kl. 20.

Aðalsafnaðarfundur Stóra-Núpssóknar verður í Árnesi fimmtudaginn 26. apríl kl. 20.

Aðalsafnaðarfundur Hrunasóknar verður í safnaðarheimilinu í Hruna sunnudaginn 29. apríl kl. 20.

 

Sóknarfólk er eindregið hvatt til að mæta á fundina en þangað eru auðvitað allir velkomnir.

Sóknarnefndir og sóknarprestur

Aðalsafnaðarfundur í Ólafsvallasókn

Aðalsafnaðarfundur Ólafsvallasóknar var haldinn í Ólafsvallakirkju þriðjudagskvöldið 9. júní.  Farið var yfir starfsemi sóknarinnar og reikningar síðasta árs samþykktir samhljóða.  Helga Guðlaugsdóttir ritari sóknarnefndar gaf ekki kost á sér til endurkjörs og í stað hennar var kjörin Jóhanna Valgeirsdóttir í Brautarholti.  Guðjón Vigfússon á Húsatóftum var einnig kjörinn áfram í sóknarnefnd til fjögurra ára.  Fyrir í sóknarnefnd situr Snæbjörn Guðmundsson gjaldkeri. Á fundinum var rætt um umhirðu og umgengni í kirkjugarði, og um kirkjustarfið vítt og breitt.  Ný sóknarnefnd kemur síðan saman fljótlega og skiptir með sér verkum.  Var henni m.a. falið af fundinum að ræða við Lionsklúbbinn um að hafa umsjón með umhirðu kirkjugarðsins í sumar.  Fundi var slitið upp úr kl. 22.

Aðalsafnaðarfundur Ólafsvallasóknar 20. maí

Aðalsafnaðarfundur Ólafsvallasóknar verður haldinn miðvikudaginn 20. maí nk. kl. 20:30 í Ólafsvallakirkju.  Venjuleg aðalfundarstörf skv. starfsreglum Kirkjuþings um sóknarnefndir.  Allir velkomnir!

Aðalsafnaðarfundur í Hrunasókn

Aðalsafnaðarfundur Hrunasóknar var haldinn í safnaðarheimilinu í Hruna mánudagskvöldið 4. maí kl. 20:30.  Marta Esther Hjaltadóttir fór yfir starfsemi sóknarinnar á síðasta ári og Jóhanna Bríet Ingólfsdóttir gjaldkeri lagði fram reikninga sóknarinnar og voru þeir samþykktir.  Þá las ritari, Þorleifur Jóhannesson, fundargerð síðasta aðalsafnaðarfundar.  Sr. Óskar kynnti reikninga prestakallssjóðs og ræddi helstu þætti í kirkjustarfi sóknar og prestakalls.  Kosið var um tvo aðalmenn í sóknarnefnd til fjögurra ára og voru þær Marta og Jóhanna kosnar með lófataki.  Tveir nýir fulltrúar voru kjörnir í varasóknarnefnd til fjögurra ára, þau Aðalsteinn Þorgeirsson á Hrafnkelsstöðum og Valný Guðmundsdóttir í Skipholti.  Almennar umræður voru um starfið í sókninni framundan, m.a. um fyrirhugaðar framkvæmdir við kirkjugarð en hlaða á upp nýjan grjótvegg þar á þessu sumri, þá var einnig rætt um helstu viðburði á 150 ára afmæli kirkjunnar á þessu ári.  Einnig urðu umræður um hvort kirkjan eigi alltaf að vera opin eins og verið hefur.  Sömuleiðis urðu umræður um varðveislu ýmissa gripa í eigu kirkjunnar sem bæði eru í krikjunni sjálfri og í safnaðarheimilinu.  Frekari umræður og úrlausn voru falin sóknarnefnd.  Boðið var upp á myndarlegar kaffiveitingar á fundinum en fundarmenn voru hátt á annan tuginn.

Aðalsafnaðarfundur Hrepphólasóknar

Mánudaginn 27. apríl sl. var aðalsafnaðarfundur Hrepphólasóknar haldinn í safnaðarheimili kirkjunnar.  Magnús H. Sigurðsson formaður sóknarnefndar fór yfir helstu starfsþætti síðasta árs og Arnfríður Jóhannsdóttir gjaldkeri lagði fram reikninga sóknarinnar sem samþykktir voru samhljóða.  Sr. Óskar fór yfir reikning prestakallssjóðsins og rakti helstu atriðin í krikjustarfinu á síðasta ári.  Katrín Ólafsdóttir í Hrepphólum lét af störfum sem sóknarnefndarfulltrúi eftir langt og farsælt starf og voru henni afhent blóm af því tilefni og þökkuð heilladrjúg störf í þágu sóknarinnar.  Katrín verður þó áfram meðhjálpari kirkjunnar.  Kosið var um tvo aðalmenn í sóknarnefnd.  Magnús H. Sigurðsson var endurkjörinn til fjögurra ára og ný í sóknarnefnd var svo kostinn Jóna Heiðdís Guðmundsdóttir.  Magnús formaður sagði að stefnt væri að málningarvinnu við kirkjuna næsta sumar og þá yrði áfram lagt upp með að kirkjugarðurinn yrði sleginn og hirtur í sjálfboðavinnu.  Almennar umræður urðu um kirkjustarfið og helstu framkvæmdir en að því búnu var fundi slitið og gengu fundarmenn þá til kaffidrykkju og var vel í lagt með kaffinu.

Aðalsafnaðarfundir framundan

Aðalsafnaðarfundir eru framundan í prestakallinu.  Mánudagskvöldið 27. apríl kl. 20:30 verður aðalsafnaðarfundur Hrepphólasóknar haldinn í safnaðarheimili Hrepphólakirkju og mánudagskvöldið 4. maí kl. 20:30 verður aðalsafnaðarfundur Hrunasóknar haldinn í safnaðarheimili Hrunakirkju.  Venjuleg aðalfundarstörf skv. starfsreglum kirkjunnar um sóknarnefndir.  Allir velkomnir!

Héraðsfundur var haldinn í Skógum

Héraðsfundur Suðurprófastsdæmis var haldinn í Skógum undir Eyjafjöllum laugardaginn 21. mars.  Til fundarins eru boðaðir sóknarnefndarmenn og prestar úr prófastsdæminu til að fara yfir ársskýslur sókna og ræða kirkjustarfið á svæðinu.  Málefni kirkjuþings og kirkjunnar almennt voru einnig til umræðu.  Prófastur Suðurprófastsdæmis er sr. Halldóra Þorvarðardóttir í Fellsmúla.  Suðurprófastsdæmi nær frá Þorlákshafnarprestakalli í vestri að Hafnarprestakalli í austri.

Aðalsafnaðarfundur Stóra-Núpssóknar: Kosning og umgengnisreglur fyrir kirkjugarð

Þriðjudagskvöldið 17. mars sl. var aðalsafnaðarfundur Stóra-Núpssóknar haldinn í félagsheimilinu í Árnesi.  Formaður og gjaldkeri fluttu skýrslu síðasta starfsárs og var hún samþykkt samhljóða.  Sóknarprestur ræddi um kirkjustarfið og fjárstreymi í sameiginlegum prestakallssjóði allra sókna í Hrunaprestakalli.  Þá voru kynntar umgengnisreglur um kirkjugarðinn á Stóra-Núpi og var sóknarnefnd falið að ljúka frágangi þeirra.  Kosið var um tvo aðalmenn í sóknarnefnd og tvo varamenn.  Kristjana Heyden, formaður, og Ámundi Kristjánsson gjaldkeri voru kjörin með lófataki sem aðalmenn í sóknarnefnd til næstu fjögurra ára.  Varamenn til fjögurra ára voru kjörnir Árdís Jónsdóttir í Geldingaholti og Helga Kristinsdóttir á Lómsstöðum.  Rætt var um framkvæmdir í Stóra-Núpskirkju sem staðið hafa á síðustu mánuðum og einnig um kirkjustarfið vítt og breitt.  Góður andi ríkti á fundinum og var bjartsýni einkennandi um framtíð sóknar og kirkjustarfs.

Sóknarnefndarfundur í Hrepphólasókn

Mánudaginn 3. mars var haldinn sóknarnefndarfundur í Hrepphólasókn.  Mættir voru bæði aðal- og varamenn í sóknarnefnd ásamt sóknarpresti.  Rætt var um starfsemina í sókninni á síðasta ári, m.a. um prestaskipti og helstu framkvæmdir við kirkju og kirkjugarð.  Þá var ákveðið að ráðast í framkvæmdir á timburverki kirkjunnar að utan á komandi sumri.  Fram kom að hirðing kirkjugarðsins verður unnin í sjálfboðavinnu eins og síðasta sumar.  Sr. Óskar fór yfir safnaðarstarfið og var m.a. rætt um Passíusálmalesturinn sem að venju verður í kirkjunni á föstudaginn langa.  Ákveðið var að halda aðalsafnaðarfund sóknarinnar mánudagskvöldið 20. apríl nk. kl. 20:30 í safnaðarheimili Hrepphólakirkju.  Að lokum urðu almennar umræður um starfið í sókninni og fleira.

Sóknarnefndarfundur í Hrunasókn

Mánudaginn 16. febrúar var haldinn sóknarnefndarfundur í Hrunasókn.  Mættir voru bæði aðal- og varamenn í sóknarnefnd ásamt sóknarpresti.  Meðal þess sem rætt var á fundinum var dagskrá afmælisárs Hrunakirkju og helstu framkvæmdir sem ætlunin er að ráðast í á næstunni.  Stefnt er að því að ráða hleðslumann til að hlaða upp kirkjugarðsvegg nú á vordögum og einnig eru uppi áform um að koma fyrir veglegu upplýsingaskilti við kirkjuna þar sem saga kirkju og Hrunastaðar væri rakin í stuttu máli.  Fram kom að afmælisnefndin myndi funda fljótlega til útfæra dagskrá afmælisársins frekar.  Á fundinum var ákveðið að stefna að aðalsafnaðarfundi Hrunasóknar í byrjun maí.  Þá var tilkynnt að héraðsfundur Suðurprófastsdæmis verði haldinn laugardaginn 21. mars í Skógum undir Eyjafjöllum.  Hrunasókn mun senda þangað sína fulltrúa til fundarsetu.  Tilkynnt var að í desember hefði nýtt teppi verið lagt í Hrunakirkju og er almenn ánægja með það.  Að síðustu fór sóknarprestur yfir helstu þætti í kirkjustarfinu framundan.